Aspekte të disa prej parimeve mbi të cilat mbështet ligji uniform për kontratat e shitjes ndërkombëtare të mallrave

• Pages: 45-53

45

Balkan Journal of Interdisciplinary Research

IIPCCL Publishing, Graz-Austria

ISSN 2410-759X

Acces online at www.iipccl.org

Vol. 7 No.3

January, 2022

Aspekte të disa prej parimeve mbi të cilat mbështet ligji uniform për

kontratat e shitjes ndërkombëtare të mallrave

Dr. Ilda Muçmataj

Abstrakt

Ky punim ka për qëllim të analizojë aspekte të disa prej parimeve kryesore mbi të cilat

mbështetet Konventa e Vjenës. “Për kontratat për shitjen ndërkombëtare të mallrave” në të

cilën Republika e Shqipërisë është shtet anëtar.1 Konventa mbështetet dhe udhëhiqet nga

një numër i gjerë parimesh, por parimet të cilat janë marrë në konsideratë në këtë punim

përfshihen në dispozitat me zbatim të përgjithshëm të Konventës,2 këtu përmendim: parimin

e autonomisë së palëve dhe lirisë së formës si dhe parimin e mirëbesimit.

Fjalë kyçe: Kontratë shitje, ndërkombëtare, mallra, ligj uniform, parime.

1. Hyrje

Konventa e Vjenës “Për Kontratat për Shitjes Ndërkombëtare të Mallrave” e

prezantuar nga Kombet e Bashkuara është cilësuar shpesh edhe si ligj uniform për

shkak të synimit të saj për të uniformizuar ligjin substancial për shitjen ndërkombëtare

të mallrave në nivel botëror. Kjo edhe pasi pjesëmarrja e shteteve në të është mjaft e

gjerë, kështu deri më 24 Shtator 2020 në të kanë aderuar 94 shtete me sistemet të

ndryshme sociale, ekonomike dhe ligjore.3

Në Preambulën e Konventës parashikohet se ky akt është krijuar për qëllimin e

nxitjes së marrëdhënieve miqësore ndërmjet shteteve duke adaptuar rregulla të

njësishme, të cilat rregullojnë kontratat për shitjen ndërkombëtare të mallrave dhe

marrin parasysh sistemet e ndryshme sociale, ekonomike dhe ligjore. Konventa do

të kontribuojë në heqjen e barrierave ligjore në tregtinë ndërkombëtare dhe nxisë

zhvillimin e tregtisë ndërkombëtare. Po ashtu, edhe në faqen e Komisionit të Kombeve

të Bashkuara për të Drejtën Ndërkombëtare Tregtare (UNCITRAL) parashikohen se

ndër qëllimet kryesore të saj përfshin: lehtësimin në masë të tregtisë midis shteteve,

krijimin e një regjimi uniform, modern dhe të drejtë për rregullimin e kontratave

të shitjes ndërkombëtare të mallrave, rritjen e sigurisë ligjore si dhe zvogëlimin e

kostove të veprimeve juridike ndërkombëtare ndërmjet palëve.4

Në mënyrë që të prodhohet uniformitet në zbatimin e Konventës, është mjaft e

rëndësishme që dispozitat e saj të interpretohen në të njëjtën mënyrë nga të gjithë

shtetet anëtare të saj. Për këtë arsye parimet e përgjithshme mbi të cilën bazohet

Konventa luajnë një rol mjaft të rëndsishëm. Rëndësia e parimeve të përgjithshme

në marrëdhëniet kontraktore pasqyrohet edhe në nivelin ndërkombëtar edhe për

shkak të përfshirjes së tyre në instrumentet ligjorë ndërkombëtar sikurse është edhe

Konventa.

Në këtë kontekst në tekstin e saj, referuar nenit 7(2) parashikon se: “Çështjet që kanë

të bëjnë me problemet e rregulluara prej saj, të cilat nuk qartësohen shprehimisht në të

duhet të zgjidhen në përputhje me parimet e përgjithshme mbi të cilën ajo bazohet...”.