Barra e provës në procedimin parandalues/ligjin Antimafia

• Author: Lirime Çukaj
• Position: Fakulteti i Drejtësisë, i UT-së
• Pages: 227-236

227

ISSN 2410-759X

Acces online at www.iipccl.org

Balkan Journal of Interdisciplinary Research

IIPCCL Publishing, Tirana-Albania Vol. 1 No. 2

September 2015

Barra e provës në procedimin parandalues/ligjin Antimafia

Dr. Lirime Çukaj

Fakulteti i Drejtësisë, i UT-së

Abstrakt

Procedimi parandalues, i sanksionuar për herë të parë në vitin 2004, nëpërmjet ligjit

kundër Krimit të Organizuar dhe më vonë nëpërmjet ligjit Anti-mafia, është një risi për

të drejtën Shqiptare. Në këtë procedim u parashikua, sekuestrimi dhe konfiskimi i

produkteve të veprës penale jashtë procedimit penal. Qëllimi i këtij procedimi ishte lufta

kundër veprimtarive më të rrezikshme kriminale, si krimi i organizuar, aktet terroriste,

trafikimet, korrupsioni, nëpërmjet sekuestrimit dhe konfiskimit të produkteve të veprës

penale. Këto masa me karakter efikas konsideroheshin një mjet efektiv në luftën kundër

veprimtarive më te rrezikshme kriminale dhe ky efikasitet ishte e lidhur edhe me veçoritë

e këtij lloj gjykimi, i cili përmbysi disa nga normat dhe parimet tradicionale të gjithë

pranuara nga e drejta ndërkombëtare.

Një nga veçoritë apo risitë e këtij procedimi ishte edhe barra e provës(onus probandi), e

cila ndryshon plotësisht nga procedimi penal. Në procedimin parandalues barra e provës

paraqitet interesante, pasi ajo nuk është e njëjtë me procedimin penal por nuk është as

edhe më procedimin civil.

Barra e provës në procedimin parandalues, fillon me prokurorin, i cili ka barrën e provës

për të vërtetuar përpara gjykatës se personi, akuzohet për një nga ato veprat që kanë

rrezikshmëri të lartë, si Krimi i Organizuar( këtu e në vijim K. O), trafikimet, aktet

terroriste, korrupsioni etj, ka një nivel të pajustifikueshëm të të ardhurave dhe jetës që

ai bën, ka një disproporcion midis pasurive që ai ka edhe të ardhurave të ligjshme të

deklaruara dhe përfundon me personin i cili ka barrën e provës për të provuar origjinën

e ligjshme të pasurisë. Pikërisht këtë përpiqet të trajtojë ky artikull në vijim.

Fjalë kyce: procedimi parandalues, sekuestrim, konfiskim, barra e provës, transferimi i barrës së provës,

ligji Anti-mafia.

1. Dy fjalë për pocedimin parandalues/ ligjin Anti-mafia

Në vitin 2004, Shqipëria miratoi ligjin me nr. 9284, dt. 30.09.2004 “Për Parandalimin

dhe Goditjen e Krimit të Organizuar”, i njohur ndryshe edhe si ligji kundër Krimit

të Organizuar, si një detyrimi ndërkombëtar dhe në vazhdimësi të luftës kundër

veprimtarive të rrezikshme kriminale si krimi i organizuar, aktet terroriste, trafikimet

dhe më vonë edhe aktet korruptive, veprimtari këto të cilat ishin shumë shqetësuese

për Shqipërinë. Në vazhdimësi po të reformave ligjore miratoi ligjin me nr. 10192,

dt. 03.12.2009 “Për Parandalimin dhe Goditjen e Krimit të Organizuar dhe Trafikimit

nëpërmjet masave kundër pasurisë”, i njohur ndryshe edhe si ligji Anti-mafia, i cili

kishte si qëllim rritjen e efikasitetit të procedimit parandalues, të sanksionuar me

ligjin kundër Krimit të Organizuar.

Në të dyja ligjet parashikohet, sekuestrimi dhe konfiskimi i produkteve të veprave

penale, si mjete efikase kundër aktiviteti kriminal. Shumica e shteteve e pranojnë se